काठमाडाैँ । सरकारले विद्युतीय सवारी प्रवर्द्धन गर्ने नीति लिएसँगै यसको प्रयोग बढ्दै गएको छ । नागरीकसँगै निजी क्षेत्र, सरकारी निकायहरूले कार्यालय प्रयोजनका लागि विद्युतीय सवारीको प्रयोग बढाउन थालेका छन् ।
नेपाल विद्युत् प्राधिकरण, नेपाल आयल निमगलगायत निजी क्षेत्रले विद्युतीय सवारी खरिद गरी प्रयोग गरिरहेका छन् । यसैगरी, खाद्य संस्थान तथा व्यापार कम्पनी लिमिटेडले पनि विद्युतीय कार, स्कुटर र मोटरसाइकल खरिद प्रक्रिया अघि बढाएको छ ।
कम्पनीले यसका लागि बोलपत्रदाता समेत छनौट गरिसकेको छ । संस्थानले दुईवटा विद्युतीय कार र ५/५ वटा विद्युतीय स्कुटर र मोटरसाइकल खरिदका लागि बोलपत्र स्वीकृत गरेको हो ।
दुईवटा विद्युतीय कार ६८ लाख ९० हजार ६०० रुपैयाँमा किन्न लागेको हो । त्यस्तै ५ वटा मोटरसाइकल डी लाइफस्टाइलसँग २४ लाख १९ हजार ४९९ रुपैयाँमा खरिद गर्न लागेको संस्थानले जनाएको छ ।
विद्युतीय स्कुटर भने इको इन्फिनिटीसँग खरिद गर्न लागेको छ । ५ वटा विद्युतीय स्कुटरका लागि संस्थानले २३ लाख ७५ हजार रुपैयाँमा टेन्डर स्वीकृत गरेको छ ।
