काठमाडौँ । विद्युत् नियमन आयोगले डेडिकेटेड र ट्रंक लाइनको बक्यौता विद्युत् महसुल नउठाउन विद्युत् प्राधिकरणलाई निर्देशन दिएको छ । आयोगले मंगलबार (आज) प्राधिकरणलाई पत्रचार गर्दै उक्त बक्यौता विद्युत् महसुल टीओडी मिटर (टाईम अफ डे) को आधारमा महसुल उठाउन निर्देशन दिएको हो ।
प्राधिकरणले यसअघि मन्त्रिपरिषद्को निर्णयलाई देखाएर १५ दिनको समय दिएर उद्योगमा लाइन जोडेको थियो । उक्त समयावधि बुधबार अर्थात मंसिर १२ गते सकिँदैछ । तर, विद्युत नियमन आयोगले मंगलबार नै लाइन नकाट्न निर्देशन दिएकाले अब प्राधिकरणले लाइन काट्न नसक्ने भएको छ ।
यसैबीच, सरकारले विद्युत महशुलको बक्यौता रकम जाँच गरी टिओडी मिटर समेतको आधारमा प्रतिवेदन पेश गर्न प्रा.डा. अरविन्द कुमार मिश्रको संयोजकत्वमा गठन गरेको समितिले काम अघि बढाएको छ ।
कार्यदलमा नेपाल विद्युत प्राधिकरणका केही समयअघि अवकाशप्राप्त श्रीराम राज पाण्डे र र चार्टर्ड अकाउन्टेन्ट सुजनकुमार काफ्ले सदस्य रहेका छन् । यो कार्यदलले प्राधिकरणले काटेको बिल टाइम्स अफ डे (टिओडी) मिटरअनुसार भए/नभएको र गणना गरेको मिले/नमिलेको जाँच गर्ने छ ।
