काठमाडाैँ । सप्तरीको खड्क नगरपालिकाले स्थानीय किसानको सिँचाइ मिटरको बक्यौता महसुल नेपाल विद्युत् प्राधिकरण बोदेबरसाइन वितरण केन्द्रलाई बुझाएको छ । नगरपालिकाले दोस्रो पटक किसानको सिँचाइ मिटरवापतको बक्यौता महसुल बुझाएको हो ।
नगरपालिकामा रहेका सम्पूर्ण किसानको सिँचाइ मिटर वापतको १२ लाख रुपैयाँ बक्यौता महसुल चेकमार्फत बुझाएको केन्द्र प्रमुख ई.संयोग विश्वकर्माले जानकारी दिए । यसअघि पनि नगरपालिकाले सिँचाइ मिटरवापतको ७ लाख ३३ हजार ७०५ रुपैयाँ बक्यौता बुझाएको थियो ।
आगामी दिनमा पनि नगरपालिकाले नै सिँचाइ मिटरवापतको बक्यौता भुक्तानी गर्ने भएकोले किसानहरूमा उत्साह बढाएको छ । यसले कृषि प्रधान देश कृषि क्रान्तिको बाटोतिर अग्रसर हुँदै गएको प्रष्ट देखिन्छ ।
