काठमाडौँ । सिन्धुपाल्चोकको भोटेकोसी गाउँपालिकामा निर्माणाधीन ४४ मेगावाटको भोटेकोसी–१ जलविद्युत् आयोजनाको मुख्य सुरुङको ‘ब्रेक थ्रु’ भएको छ । इलेक्ट्रो पावर कम्पनी लिमिटेडले २०८० साउनबाट निर्माण गरेको आयोजनाको सुरुङ ‘ब्रेक थ्रु’ भएको हो ।
आयोजनाको २६३८.५३ मिटर लामो सुरुङ खन्ने काम सम्पन्न भएको कम्पनीले जानकारी दिएको छ । आयोजनाको बाँध भोटेकोसी–३ मा र विद्युतगृह भोटेकोसी–४ मा निर्माण भइरहेको छ ।
कम्पनीका अनुसार आयोजनाको हालसम्म ८० प्रतिशत निर्माण सम्पन्न भएको छ । बाँकी काम पनि यही वर्ष सम्पन्न गर्ने लक्ष्य छ ।
आयोजना निर्माण पूरा भएपछि उत्पादित विद्युत साढे २ किलोमिटर दुरीमा रहेको नेपाल विद्युत् प्राधिकरणको चाकु सबस्टेशनमा जोडिनेछ ।
