काठमाडाैँ । कोहलपुर–सुर्खेत–दैलेख १३२ केभी प्रसारण लाइन सञ्चालनमा आएको छ । नेपाल विद्युत प्राधिकरणका कार्यकारी निर्देशक हितेन्द्रदेव शाक्यले आइतबार आयोजनाको उद्घाटन गरेका हुन् ।
उद्घाटनपछि शाक्यले कर्णाली प्रदेशमै पहिलोपटक १३२ केभी प्रसारण लाइन चार्जमा ल्याउन सफल भएको बताउँदै यसले गुणस्तरीय विद्युत उपयोगको वातावरण तयार गरेको उल्लेख गरे । उनले आयोजना सञ्चालनसँगै कर्णालीमा ठूला उद्योगधन्दाको सुरुवात हुने र उद्योग क्षेत्रमा विद्युत खपत बढ्नेमा प्राधिकरण आशावादी रहेको बताए ।
कोहलपुर–सुर्खेत–दैलेख १३२ केभी प्रसारण लाइन आयोजनाअन्तर्गतको कोहलपुर–सुर्खेत खण्ड हाल सञ्चालनमा आएको हो । यसबाट ओभरलोड, बारम्बार बत्ती जाने र लो–भोल्टेजजस्ता समस्यामा सुधार आउने अपेक्षा गरिएको छ । साथै, यस क्षेत्रबाट उत्पादन हुने विद्युतलाई राष्ट्रिय प्रसारण ग्रिडमा जोड्न पनि आयोजना महत्वपूर्ण हुने प्राधिकरणको भनाइ छ ।
शाक्यका अनुसार सबै फिडरहरू सुर्खेतस्थित स्वचालित सब–स्टेशनबाट आपूर्ति हुने भएपछि उपयुक्त समय मिलाएर निर्वाचनपछि औपचारिक उद्घाटन गरिनेछ ।
आयोजनाका प्रमुख रविकुमार चौधरीले जग्गा प्राप्ति, वन क्षेत्र कटान र स्थानीय जग्गाधनीसँगका विवाद समाधान गर्दै आयोजना सफलतापूर्वक सम्पन्न गरिएको बताए । उनका अनुसार करिब ७५ करोड रुपैयाँ लागतमा निर्माण भएको सब–स्टेशन तयारी अवस्थामा छ भने करिब ६५ करोड रुपैयाँ लागतको प्रसारण लाइन परीक्षणपछि सञ्चालनमा ल्याइएको हो ।
