काठमाडाैँ । राजधानीको भृकुटीमण्डपमा मंगलबारदेखि सुरू भएको १७औँ नाडा शोमा विभिन्न आठ वाणिज्य बैंकहरुले सहभागिता जनाएका छन् । नेपाल अटो मोबाइल्स एसोसिएसन (नाडा) द्वारा आयोजित अटाे शाे मा सहभागी बैंकहरूले झन्डै आधारदरमै र न्यूनतम ६.२३ देखि ८.१५ प्रतिशत अटो लोन दिने योजना सार्वजनिक गरेका छन् ।
सवारीसाधन कर्जा विस्तार बढाउन बैंक तथा वित्तीय संस्थाहरूले अटाे शाेमा ग्राहकलाई सहुलियत र सस्तो ब्याजदरमा ‘अटो लोन स्किम’ सार्वजनिक गर्दै स्टल राखेका छन् । सामान्यतयभन्दा सहज र सस्तो ब्याजदर कर्जा स्किम ल्याउँदै हिमालयन, ग्लोबल आइएमई, नबिल, सानिमा, माछापुच्छ्र्रे, लक्ष्मी सनराइज र महालक्ष्मी विकास बैंकले यस पटकको नाडा अटो मेलामा स्टल राखेका छन् ।
अटाे शाे मा नबिलको आधारदर ५.७४ प्रतिशत रहेको छ । नबिलले बैंकबाट कर्जा लिनका लागि मासिक किस्ताको दोब्बर आम्दानी हुनुपर्ने सर्त राखेको छ। आधारदरमा प्रिमियम थप्दा बैंकले ६.७४ प्रतिशत ब्याजमा ईभी गाडी खरिदमा ऋण दिनेछ । बैंकले न्यूनतम पाँचदेखि सात वर्षसम्म अवधिका लागि अटो लोन दिने जनाएको छ ।
एनएमबी बैंकले नाडा अटो शोमा सहभागिता जनाउँदै अटो लोन योजना सार्वजनिक गरेको छ । यो योजनाअन्तर्गत एनएमबीले सात वर्ष अवधिका लागि फिक्स्ड ब्याजदरमा ८.८९ प्रतिशत र फ्लोटिङ दरमा साढे सात प्रतिशत ब्याजदर निर्धारण गरेको छ । अटो लोनका निम्ति आवेदन प्रक्रिया सहज र लचिलो बनाइएको बैंकले जानकारी दिएको छ ।
ग्लोबल आइएमई बैंकले न्यूनतम ६.९९ देखि ८.२५ प्रतिशत ब्याजमा अटोलोन दिने भएको छ । फ्लोटिङदरमा ६.९९ रहेको छ भने फिक्स्डमा ८.२५ प्रतिशत ब्याजदर रहेको छ ।
यस्तै हिमालयन बैंकले साढे ७ प्रतिशत ब्याजमा ईभी गाडी खरिदका लागि ऋण दिने भएको छ । ऋणको अवधि आठ प्रतिशत रहेको छ । यस्तै डिजेल गाडीमा ८ वर्षका लागि ७.६५ प्रतिशत ऋण दिने बैंकले जनाएको छ ।
यस्तै लक्ष्मी सनराइज बैंकले बेस रेटमा एक प्रतिशत ब्याजमा अटोलोन दिने भएको छ । बैंकले फ्लोटिङदरमा ७.३५ प्रतिशत ब्याजमा अटो लोन दिने बैंकले जनाएको छ । बैंकले दिने अटो लोनको अवधि सात वर्ष हुनेछ । यस्तै फिक्सडदरमा सात वर्षका लागि ७.९९ प्रतिशत ब्याजमा ऋण दिने भएको छ । अफर आगामी १४ मंसिरसम्म लागु हुनेछ ।
कृषि विकास बैंकले सबैभन्दा कम ६.२३ प्रतिशत ब्याजमा ईभी लोन योजना ल्याएको छ । बैंकले नाडा अवधिभर सेवा शुल्कमा ३३ प्रतिशत छुट दिएको जनाएको छ । नाडामा सबैभन्दा सस्तो दरमा अटोलोन दिने बैंक कृषि विकास भएको छ ।
यसैगरी सानिमा बैंकले पनि पाँच वर्षका लागि ७.९९ र सात वर्षमा ८.१५ प्रतिशत ब्याजमा अटो लोन दिने जानकारी दिएको छ । नेपाल एसबीआई बैंकले आधारदरमा ०.७० प्रतिशत प्रिमियम थपेर अटो लोन दिने भएको छ । आधारदर अझै घट्ने भएकाले खुलाएको छैन ।
गत असारसम्म बैंकको आधारदर ६.२९ प्रतिशत रहेको छ । आधारदर अझ घट्ने जानकारी बैंकले दिएको छ । नेपाल राष्ट्र बैंकले ईभी ऋण सीमा घटाएर ६० प्रतिशतमा झारेको छ । ईभी किन्ने व्यक्तिले ४० प्रतिशत डाउन पेमेन्ट गर्नुपर्ने हुन्छ ।
