काठमाडाैँ । चीनसँग जोडिएको लोमान्थाङस्थित कोरला नाकाबाट एक सय भन्दा बढी विद्युतीय सवारी नेपाल भित्रिएका छन् । याे नाकाबाट पहिलो पटक ठूलो परिमाणमा विद्युतीय सवारीसाधन आयात सुरु भएको हाे ।
भन्सार विभागको प्रक्रिया पूरा गरी भित्रिएका एक सय भन्दा बढी विद्युतीय सवारी हाल न्हेचुङ भन्सार कार्यालयमा राखिएका छन् । मुस्ताङ भन्सार कार्यालयका अनुसार कोरलानाकाबाट करिब ५०० भन्दा बढी बीवाइडी कम्पनीका सवारी ल्याइने तयारी भइरहेको छ । प्रमुख जिल्ला अधिकारी विष्णुप्रसाद भुसालले आठ दिनअघि मात्रै खोलिएको यस नाकाबाट हालसम्म एक सय भन्दा बढी सवारी भित्रिएको जानकारी दिए ।
यसअघि ती विद्युतीय सवारी रसुवागढी र तातोपानी नाकाबाट आयात गर्ने योजना थियो । तर, बाढी–पहिरोका कारण ती नाका अवरुद्ध भएपछि कोरलालाई वैकल्पिक मार्गको रूपमा प्रयोग गरिएको हो । “चिनियाँ भन्सारमा जाँचपास भएपनि नेपाली भन्सार प्रक्रियाबाट पनि ती सवारी पार हुन्छन्,” प्रजिअ भुसालले बताए ।
