काठमाडाैँ । चालु आर्थिक वर्ष २०८२/८३ को पहिलो दुई महिनामा काँकरभिट्टा नाकाबाट करिब रु दुई अर्ब ८४ करोड ४८ लाख ८४ हजार बराबरको पेट्रोलियम पदार्थ आयात गरिएको छ । यस अवधिमा पेट्रोल, डिजेल, एलपी ग्यास, एटिएफ र मट्टितेल आयात भएको मेची भन्सार कार्यालयले जनाएको छ ।
भन्सार कार्यालयका सूचना अधिकारी ईश्वरकुमार हुमागाईँका अनुसार गत आर्थिक वर्षको सोही अवधिको तुलनामा पेट्रोलियम पदार्थ आयात रकम रु १० करोड ६१ लाख २८ हजार अर्थात् ३.६० प्रतिशतले घटेको छ। तर, राजस्व भने रु ६४ लाख तीन हजार (०.५० प्रतिशत) ले बढेको छ ।
कार्यालयको तथ्याङ्कअनुसार साउन–भदौ महिनामा मात्रै पेट्रोलियम पदार्थ आयातबाट रु एक अर्ब ३९ करोड ८६ लाख ३० हजार राजस्व संकलन भएको छ ।
उक्त अवधिमा रु १ अर्ब ४२ करोड ७२ लाख बराबरको १६ हजार ३५२ किलोलिटर पेट्रोल, रु ८४ करोड ४२ लाख बराबरको ९ हजार ४ किलोलिटर डिजेल , रु ४० करोड ४९ लाख बराबरको ४ हजार २३३ मेट्रिक टन एलपी ग्यास , रु १३ करोड २८ लाख बराबरको १ हजार ४८८ किलोलिटर एटिएफ र रु २ करोड २२ लाख बराबरको २४८ किलोलिटर मट्टितेल आयात गरिएको भन्सार कार्यालयले जनाएको छ ।
