काठमाडौँ । पशुपति रिन्यूबल्स लिमिटेडले निर्माण सम्पन्न गरेको १० मेगावाटको सौर्य परियोजनाले अन्तर्राष्ट्रिय नवीकरणीय ऊर्जा प्रमाणपत्र (International Renewable Energy Certificate I–REC) पाउन सफल भएको छ ।
नेपालको पहिलो सौर्य आयोजनाको रूपमा धरमनगर सोलार फार्म–१ परियोजनाले अन्तराष्ट्रिय नवीकरणीय ऊर्जा प्रमाणपत्र प्राप्त गरेको हो । यसअघि जलविद्युततर्फको टक्सार पिखुवा खोला हाइड्रो पावर लिमिटेडले अन्तर्राष्ट्रिय नवीकरणीय ऊर्जा प्रमाणपत्र पाएको थियो ।
धरमनगर–१ परियोजनाले वार्षिक २०.१ गिगावाट घन्टा विद्युत् उत्पादन गर्नेछ । यसैगरी, कम्पनीले अघि बढाएको १५ मेगावाटको धरमनगर सोलार फार्म–२ परियोजना पनि सूचिकृत हुने प्रक्रियामा रहेको छ ।
यो दुवै आयोजना कपिलवस्तुको शिवराज नगरपालिका–६ मा अवस्थित छ ।
