काठमाडौँ । सिद्धि हाइड्रो पावर कम्पनीले इलाम जिल्लाको सुर्याेदय नगरपालिका र रोङ गाउँपालिकामा निर्माण गरिरहेको १० मेगावाटको सिद्धि खोला जलविद्युत् आयोजनाको काम ८९ प्रतिशत पूरा भएको छ ।
आयोजनाको काम सुरु भएको १८ महिनामै निर्माण अन्तिम चरणमा पुगेको कम्पनीका निर्देशक सन्तोष राज नेपालले बताए ।
यो आयोजना सम्पन्न गर्न करिब १ अर्ब ७३ करोड रुपैयाँ लागत अनुमान गरिएको छ । जसमा सिटिजन्स बैंक इन्टरनेशनलको एकल ऋण लगानी छ । बैंकले कूल लगानीको ७५ प्रतिशत ऋण लगानी गरेको छ । बाँकी २५ प्रतिशत स्वपूँजी लगानी छ ।
आयोजना पुरा भएपछि वार्षिक ५५.७१६ गिगावाट घन्टा विद्युत् उत्पादन हुनेछ । हिउँदयाममा ८.८०५ गिगावाट घन्टा र बर्खायाममा ४६.९११ गिगावाट घन्टा विद्युत् उत्पादन हुनेछ । उत्पादीत विद्युत् १६ किलोमिटर दुरीमा रहेको नेपाल विद्युत् प्राधिकरणको सुनमाईमा सबस्टेसनमा जोडिनेछ ।
