काठमाडौँ । भौतिक पूर्वाधार तथा यातायात मन्त्री देवेन्द्र दाहालले वातावरणमैत्री यातायात र संरचना नेपालको प्राथमिकतामा रहेको बताए । संरचनाहरु निर्माणको क्रम देखिनै वातवरणीय क्षति हुन नदिने र वातावरणमैत्री सवारी साधनहरुलाई प्रोत्साहन गरिने उनको भनाई छ ।
सोसाईटी अफ ट्रान्सपोर्ट ईन्जिनियर्स नेपालको आयोजनामा शुक्रबार देखि काठमाडौमा शुरु भएको अन्तर्राष्ट्रिय सम्मेलनको उद्घाटनका क्रममा उनले यातायात र वातावरणको सवाल अहिले विश्वव्यापी चासो रहेको समेत उल्लेख गरे । नेपालकोे यातायात प्रणालीलाई आधुनिक र सुव्यवस्थित बनाउन सरकार सक्रिय रहेको उल्लेख गर्दै उहाँले वातावरणमैत्री, दिगो, प्रविधिसम्पन्न, अपांगमैत्री र प्रयोगकर्तामैत्री यातायात प्रणाली विकास गर्ने नेपालको लक्ष्य रहेको बताए ।
सुरक्षित, बलियो र वातावरणमैत्री सडक पूर्वाधार निर्माण गर्नु, साथै शहरी तथा ग्रामीण क्षेत्रलाई जोड्ने सडक सञ्जाल विस्तार गर्नु र सार्वजनिक यातायात, सडक सुरक्षालगायतका क्षेत्रमा सुधार ल्याउन नीति र कानुनी संरचना लागू गर्नु अहिलेको आवश्यकता भएकाले सरकारले त्यस तर्फ समेत काम गरि रहेको मन्त्री दाहालले बताए ।
नेपालको पूर्वाधार निर्माण तिव्र रुपमा भई रहेको उल्लेख गर्दै उहाँले २ दशक अघि सम्म पनि देशको मुख्य सडक पूर्व–पश्चिम राजमार्ग मात्र रहेको उल्लेख गर्दै मन्त्री दाहालले हालको अवस्थामा तीनवटा प्रमुख पूर्व–पश्चिम राजमार्गहरू र एक एशियाली मापदण्डको राजमार्ग एकै साथ निर्माण भइरहेको बताए ।
त्यसैगरी, उत्तर–दक्षिण दिशाका राजमार्ग र करिडोरहरूको पनि विकास भइरहेको र राजधानी काठमाडौं बाहेक, व्यापारिक र रणनीतिक दृष्टिले महत्वपूर्ण सडकहरू निर्माण भइरहेको उल्लेख गर्नु भयो । नेपालमा केहि भएन र केहि हुन सकेन भन्ने भाष्य चिर्न जरुरी रहेको भन्दै दाहालले सडक तथा पूलहरुका साथै हाल दुईवटा अन्तर्राष्ट्रिय विमानस्थलहरू निर्माण भइसकेको र अब नेपाल आधुनिक सुरुङ मार्गको युगमा प्रवेश गरिसकेको बताउनु भयो । नागढुंगा सुरुङ आगामी एक वर्षभित्र सञ्चालनमा आउने तयारीमा रहेको र सिद्धबाबा सुरुङमा ब्रेकथ्रु भइसकेको तथा द्रुतमार्ग (फास्ट ट्र्याक) निर्माण पनि तिव्र रुपमा भई रहेको बताउनुभयो । मन्त्री दाहालले भन्नुभयो, ‘जसले भन्छन् ‘केही भएको छैन’—उनीहरूलाई केही वर्षभित्रै हामी ४ देखि ६ लेनसम्मका पूर्व–पश्चिम राजमार्ग र कम्तिमा २ लेनका उत्तर–दक्षिण सडकहरू पूर्ण रूपमा निर्माण भइसकेको देखाउनेछौं ।’ कार्यक्रममा मन्त्रालयका सचिव केशवकुमार शर्माले नेपालमा पूर्वाधार निर्माणको अवस्था, चरण र भावि कार्यदिशाका बारेमा प्रकाश पार्नु भएको थियो । भौतिक पूर्वाधार तथा यातायात मन्त्रालय समेतको आयोजनामा भएको तीन दिने सम्मेलनमा विश्वका विभिन्न देशका विज्ञ तथा प्राध्यापकहरुले कार्यपत्रहरु प्रस्तुत गर्ने आयोजक संस्थाका अध्यक्ष डा.हरेराम श्रेष्ठले बताउनुभयो ।
