काठमाडौँ । कर्णाली प्रदेशको हुम्ला जिल्लामा ९७.१७ मेगावाटको चुवा खोला आंशिक जलाशययुक्त जलविद्युत् आयोजना निर्माण हुने भएको छ । बिजवेल इनर्जी प्रालिले सो आयोजना निर्माण गर्न लागिएको हो ।
चुवा खोलालको उपल्लो तटीय क्षेत्रमा प्रस्तावित ११०.२ मेगावाट क्षमताको अपर चुवा तुरुप्या आंशिक जलाशययुक्त आयोजनाको विद्युतगृहबाट निस्किने ३३ घनमिटर प्रति सेकेण्ड पानीको उपयोग गरी चुवा खोला निर्माण गर्न लागिएको हो ।
उक्त पानीलाई ६३६८.८ मिटर लामो हेडरेस सुरुङ मार्फत सर्ज साफ्टसम्म लागिनेछ । सर्ज साफ्टको व्यास १० मिटर र उचाई ६८.८४ मिटर डिजाइन गरिएको छ । ठाडो र तेर्सो सुरुङभित्र स्टिलको पेनस्टक पाइप राखिनेछ जसको लम्बाई ८४०.१३ मिटर रहेको छ ।
पेनस्टकबाट पानीलाई सतही विद्युतगृहमा पानी खसाली विद्युत् उत्पादन गरिनेछ । आयोजनाबाट वार्षिक ५५३.०९ गिगावाट घण्टा ऊर्जा उत्पादन हुनेछ । आयोजना निर्माण सुरु भएको ४ वर्षभित्र सम्पन्न गर्ने लक्ष्य राखिएको छ ।
आयोजना सम्पन्न गर्न १७ अर्ब ६९ करोड ३० लाख रुपैयाँ लागत अनुमान गरिएको छ । यो आयोजना यसअघि ७० मेगावाटको पहिचान भएपनि पछि क्षमता विस्तार गरिएको हो ।
