काठमाडाैँ । १३५ मेगावाट क्षमताको मनाङ मर्स्याङ्दी जलविद्युत आयोजनाको निर्माणको लागि चीनको एक्जीम बैंकसँग कर्जा सम्झौता भएको छ । मनाङ मर्स्याङ्दी जलविद्युत् कम्पनी प्रा. लि.द्वारा प्रवर्द्धित आयाेजनामा एक्जीम बैंकले चाइनिज युआन १ अर्ब २४ करोड २५ लाख चाइनिज (१७ करोड ५२ लाख ५० हजार अमेरिकी डलर) लगानी गर्न सम्झाैता भएकाे हाे ।
याे आयोजनाको सम्पन्न गर्न ३२ करोड ३० लाख अमेरिकी डलर लागत अनुमान गरिएकाे छ । बाँकी लगानी अन्य स्राेतबाट व्यवस्थापन गरिनेछ ।
कम्पनीमा नेपालको नेतृत्वदायी जलविद्युत प्रवर्द्धक बुटवल पावर कम्पनी लिमिटेड, चिनियाँ लगानीकर्ताहरू एसीआईजी इन्टरनेशनल , सिङचेङ इन्टरनेशनल इन्भेष्टमेन्ट कम्पनी लिमिटेड, र क्यूवाईईसी इन्टरनेशनल कम्पनी लिमिटेड र सो कम्पनीहरूको संयुक्त लगानीको एसीआईजी इन्टरनेसनल नेपाल हाइड्रो जोइन्ट डेभलपमेन्ट इनभेष्टमेन्ट कम्पनी प्रालिको संयुक्त लगानी रहेको छ । यस आयोजनामा ऋण तथा स्वपूँजी लगानीको अनुपात ८०:२० रहने छ । साथै, यस कम्पनीले आयोजनास्थल आसपासका स्थानीय बासिन्दाहरूलाई प्रचलित कानूनको अधिनमा रही सेयर उपलब्ध गराउने योजना समेत बनाएको छ ।
हाल आयोजनाको निर्माणकार्य इपीसी ठेक्का अर्न्तगत् सिनो हाइड्रोले गरिरहेको छ भने आयोजनाको निर्माण कार्य निर्धारित कार्ययोजना अनुरूप तोकिएको समय ४२ महिना भित्रै सम्पन्न गर्ने योजना छ। योजनाका साथ निर्माण कार्य अघि बढाइएको छ ।
