काठमाडौँ । लमजुङमा पहिचान भएको १०२ मेगावाटको मेगावाटको माथिल्लो मर्स्याङ्दी १ जलविद्युत् आयोजनामा ३ वटा बैंक तथा वित्तीय सस्थाले १६ अर्ब रुपैयाँ ऋण लगानी गर्ने भएका छन् । अप्पर मर्स्याङ्दी हाइडो पावर कम्पनीले निर्माण गर्न लागेको आयोजनामा लक्ष्मी सनराइज, ग्लोबल आइएमई र प्रभु बैंकले लगानी गर्ने भएका हुन् ।
आयोजनामा नेतृत्वकर्ता लक्ष्मी सनराइजले ७ अर्ब, सह– नेतृत्वकर्ता ग्लोबल आइएमईले ६ अर्ब र प्रभु बैंकले ३ अर्ब रुपैयाँ ऋण लगानी गर्नेगरी सम्झौता सम्पन्न भएको छ ।
आयोजना सम्पन्न गर्न २१ अर्ब ४० करोड लागत अनुमान गरिएको छ । जसमा ७४.७७ प्रतिशत बैंक ऋण र २५.२३ प्रतिशत प्रवद्र्धकको स्वपूँजी लगानी रहने छ ।
आयोजना निर्माणका लागि कम्पनीले २०७५ साल पुस १० गते नै विद्युत् विकास विभागबाट उत्पादन अनुमति लिएको थियो । २०८१ साल पुस ९ गते मात्रै आयोजनाबाट उत्पादीत विद्युत् खरिदबिक्री गर्न नेपाल विद्युत् प्राधिकरणसँग विद्युत् खरिद बिक्री सम्झौता सम्पन्न भएको छ ।
आयोजनाको काम निर्माण सुरु भएको साढे ४ वर्षमा सम्पन्न गर्ने कम्पनीको योजना छ । यसअघि यस कायोजनाको क्षमता १३४ मेगावाट भएपछि पछि घटाइएको हो ।
