काठमाडौँ । राष्ट्रिय प्रसारण ग्रिड कम्पनी लिमिटेड (आरपीजिसी) ले निर्माण गरिरहेको ४०० केभी क्षमताको कर्णाली कोरिडोर (फुकोट–बेतन–दोदोधारा) प्रसारण लाइनको भौतिक प्रगति १५ प्रतिशत सम्पन्न भएको छ । करिब एक वर्षअघि निवर्तमान ऊर्जा जलस्रोत तथा सिँचाइ मन्त्री शक्तिबहादुर बस्नेतले शिलान्यास गरेको लाइनको काम अघि बढेको हो ।
लाइनको आर्थिक प्रगति भने १३ प्रतिशत भएको आरपीजिसीले जानकारी दिएको छ । अहिले लाइनको टावर रहने फाउण्डेसन (जग) को काम भइरहेको छ ।
कर्णाली र महाकाली लगायतका नदी खोलाबाट उत्पादन भएको बिजुली राष्ट्रिय प्रसारण प्रणालीमा ल्याउन र भारत निर्यातका लागि समेत उपयोग गर्न यो लाइन निर्माण गरिएको हो । यो लाइन कालिकोटको मान्मबाट सुरु भएर अछाम, सुर्खेत हुँदै दोधारासम्म पुग्छ ।
दोदोधाराबाट पनि ४०० केभीको अर्को प्रसारण लाइन निर्माण हुने पक्रियामा रहेकोले कर्णाली कोरिडोर आन्तरिक खपत र बढी भएको बिजुली भारत निर्यात गर्नका लागि समेत महत्वपूर्ण मानिएको छ ।
यो आयोजना निर्माण पूरा भएपछि २५०० मेगावाटसम्मको विद्युत् प्रवाह गर्न सकिनेछ । यही लाइनमा जोडिनका लागि ४४० मेगावाटको तिला–१, ४४२ मेगावाटको बेतन कर्णाली, ४५० मेगावाटको सेती नदी–६, ९०० मेगावाटको माथिल्लो कर्णाली, ४८० मेगावाटको फुकोट कर्णाली अघि बढेका छन् ।
तिला–१ जलविद्युत् आयोजनाको विद्युत् यही कोरिडोरमा जोड्न आरपिजिसीसँग प्रवर्द्धक कम्पनीको ग्रिड कनेक्सन एग्रिमेन्ट समेत सम्पन्न भइसकेको छ ।
लाइन करिब १२५ किलोमिटर लामो रहनेछ । जम्मा २५६ वटा टावर रहनेछ । यस प्रसारण लाइन आयोजनामा दक्षिण एसियाकै लामो मध्यको करिब १३५० मिटर लम्बाइको ‘रिवर क्रसिङ’ रहेको छ । जसमा करिब १२० मिटर अग्ला दुईवटा टावर निर्माण गरिने छ ।
यो प्रसारण लाइनको निर्माण सम्पन्न गर्न २१.५ अर्ब रुपैयाँ लागत अनुमान गरिएको छ । लाइनमा ३ वटा सबस्टेसन निर्माण हुनेछ । फुकोट सबस्टेसन कालिकोटको खादाँचर्कमा, बेतन सबस्टेसन सुर्खेतको चौकुनेमा र दोदोधारा सबस्टेसन कैलालीको दोदोधारामा निर्माण हुनेछ ।
