काठमाडाैँ । नेपालको ऊर्जा पूर्वाधार विस्तारलाई दीर्घकालीन रणनीतिक मोडतर्फ डोर्याउने गरी लगानी बोर्डको ६७औं बैठकले एकैपटक ४ वटा महत्वपूर्ण जलविद्युत् परियोजनामा निर्णयहरू अघि सारेको छ । यसले कर्णालीदेखि अरुण काेरिडोरसम्मका परियोजनाहरू कार्यान्वयनको निर्णायक चरणमा प्रवेश गरिरहेको संकेत दिएको छ ।
प्रधानमन्त्री तथा बोर्ड अध्यक्ष सुशीला कार्कीको अध्यक्षतामा बसेको बुधबारको बैठकले ४३९ मेगावाट क्षमताको बेतन कर्णाली अर्धजलाशययुक्त जलविद्युत् परियोजनामा ९३ अर्ब ४० करोड रुपैयाँ बराबरको लगानी स्वीकृत गरेको छ । यससँगै परियोजना विकास सम्झौताका लागि वार्ता समिति गठन गर्ने निर्णय गर्दै कर्णाली क्षेत्रको ऊर्जा संरचना विकासमा नयाँ गति थपिएको छ ।
यसैगरी, ६६९ मेगावाटको तल्लो अरुण जलविद्युत् परियोजनाको उत्पादन अनुमतिपत्र मस्यौदा स्वीकृत गरी अनुमतिपत्र जारी गर्न बोर्डका सीईओलाई अख्तियारी प्रदान गरिएको छ । ९०० मेगावाट क्षमताको अरुण–३ परियोजनाको ‘डाइरेक्ट एग्रिमेन्ट’ मन्त्रिपरिषद्मा पठाउने निर्णयले लामो समयदेखि अल्झिएका अरुण बेसिनका परियोजनाहरू अब छिटो कार्यान्वयन मोडमा पुग्ने अपेक्षा बलियो बनाएको छ ।
त्यस्तै, ८०० मेगावाटको पश्चिम सेती जलाशययुक्त जलविद्युत् परियोजनाको सर्वेक्षण अनुमतिपत्रको म्याद थप गर्ने निर्णय गरेकाे छ ।
