काठमाडाैँ । नेपाल विद्युत् प्राधिकरण सञ्चालक समितिको बैंठकले २० अर्ब रुपैयाँ बराबरको ऊर्जा बण्ड निष्काशन गर्ने निर्णय गरेको छ । ऊर्जा मन्त्रालयमा आइतबार बसेको सञ्चालक समितिको बैंठकले मन्त्रिपरिषद्बाट पाएको स्वीकृत अनुसार उक्त निर्णय गरेको हो ।
असोज २३ गते बसेको मन्त्रिपरिषद् बैंठकले जलविद्युत् आयोजना निर्माणका लागि स्रोत व्यवस्थापन गर्न २० अर्ब रुपैयाँ बराबरको ऊर्जा ऋणपत्र निष्कासन गर्न स्वीकृति दिएको थियो । ठुला आयोजनाहरूमा लगानी गर्ने गरी प्राधिकरण बोर्डले ऊर्जा बण्ड निष्काशन गर्ने निर्णय गरेको हो ।
मन्त्रिपरिषद्ले ऊर्जा बण्ड निष्काशनको स्वीकृतमा नै प्राधिकरणलाई उठाइने रकम पुँजीगत खर्चमा प्रयोग गर्नुपर्ने स्पष्ट सर्त तोकेको थियो । उक्त सर्तअनुसार कार्यन्वयन गर्ने गरी प्राधिकरण बोर्डले निर्णय गरेको हो ।
ऊर्जा बण्डमार्फत उठाइने २० अर्ब रुपैयाँमध्ये ८ अर्ब रुपैयाँ माथिल्लो अरुण जलविद्युत् आयोजना (१०६३ मेगावाट), ५ अर्ब रुपैयाँ चैनपुर सेती जलविद्युत् आयोजना (२१० मेगावाट), ५ अर्ब रुपैयाँ तामाकोसी ५ जलविद्युत् आयोजना (९४.८ मेगावाट) र २ अर्ब रुपैयाँ निर्माणाधीन माथिल्लो मोदी ‘ए’ (४२ मेगावाट) जलविद्युत् आयोजनामा खर्च गर्ने योजना रहेको जनाइएको छ ।
माथिल्लो अरुण जलविद्युत् आयोजना (१०६३ मेगावाट) आयोजना स्वदेशी लगानीमा बनाउने ऊर्जा मन्त्री कुलमान घिसिङले घोषणा गरिसकेका छन् । उक्त आयोजनाको लागि विश्व बैंकले विगत १५ वर्षदेखि लगानीको लागि आग्रह गर्दा पनि लगानी जुट्न सकेको छैन ।
ऊर्जा बण्डको वार्षिक ब्याजदर ५.५ प्रतिशत रहनेछ । बण्ड निष्कासनका लागि धितोपत्र बोर्डबाट अनुमति लिनुपर्ने व्यवस्था अनुसार कुल निष्कासन हुने रकमको ०.१२ प्रतिशत शुल्क तिर्नुपर्नेछ । प्राधिकरणले छिट्टै धितोपत्र बोर्डमा निवेदन दिएर निष्कासन प्रक्रिया अघि बढाउने तयारी गरेको छ ।
