काठमाडाैँ । नेपाल विद्युत प्राधिकरण विराटनगर वितरण केन्द्रले तोकिएको समयसम्म विद्युत महसुल नबुझाउने उपभोक्तामाथि कडाइ गरेको छ । चालु आर्थिक वर्षको प्रथम चौमासिकसम्म महसुल नतिर्ने २४९ जना उपभोक्ताको विद्युत लाइन काटिएको प्राधिकरणले जनाएको छ ।
वितरण केन्द्रका प्रमुख राम उदगार शाहका अनुसार सो अवधिसम्म उपभोक्ताबाट उठ्न बाँकी विद्युत महसुल ३ करोड ४६ लाख ७६ हजार ५५१ रुपैयाँ रहेको छ । बक्यौता असुलीलाई प्राथमिकतामा राख्दै नियमित अनुगमन र कारबाही प्रक्रिया अघि बढाइएको उनले जानकारी दिए ।
प्राधिकरणका अनुसार मंसिर मसान्तसम्म १ करोड ५८ लाख ४१ हजार ३०० रुपैयाँ किस्ताबन्दी प्रणालीमार्फत असुल भइसकेको छ। बाँकी रकम उठाउन महसुल नबुझाउने उपभोक्ताको पहिचान गरी लाइन काट्ने प्रक्रिया निरन्तर जारी रहने जनाइएको छ ।
प्रमुख शाहले पटक–पटक आग्रह गर्दा पनि अटेर गर्ने उपभोक्तामाथि कडा कदम चाल्नुपरेको बताउँदै समयमै महसुल बुझाउन सबैलाई आग्रह गरे। प्राधिकरणले विद्युत सेवा सहज र नियमित राख्न समयमै महसुल भुक्तानी अपरिहार्य हुने उल्लेख गरेको छ ।
