काठमाडाैँ । वन्डर्स इनर्जी प्रालिको वार्षिक साधारणसभा आज सम्पन्न भएको छ । रामेछाप जिल्लाकाे गाेकुलगंगा गाउँपालिकामा निर्माणाधीन ९ मेगावाट क्षमताकाे खिम्ती–ध्वाँङ साना जलविद्युत् आयोजना प्रवर्द्धक कम्पनीकाे सभा आइतबार सम्पन्न भएकाे हाे ।
साधारणसभामा कम्पनीका कार्यकारी सञ्चालक प्रकाश दुलालले आयोजनाको निर्माण कार्य निर्धारित कार्यतालिकाअनुसार अघि बढिरहेको जानकारी दिँदै २०८४ साल चैतभित्र आयोजना सम्पन्न गर्ने लक्ष्य रहेकाे बताए ।
उनका अनुसार आयोजनाका लागि आवश्यक सरकारी जग्गा प्राप्ति तथा रुख कटानको अनुमति २०८३ वैशाख १५ गते बसेको मन्त्रिपरिषद् बैठकबाट स्वीकृत भइसकेको छ । यससँगै आयोजनाको निर्माण कार्यले थप गति लिने अपेक्षा गरिएको छ ।
आयोजनाको कुल लागत करिब १ अर्ब ९० करोड रुपैयाँ रहेको जानकारी दिँदै दुलालले १ अर्ब २५ करोड रुपैयाँ ऋण लगानीका लागि एनएमबी बैंकसँगको समझदारी अन्तिम चरणमा पुगेको बताए । बाँकी ६५ करोड रुपैयाँ स्वपुँजीमध्ये ३५ करोड रुपैयाँ जुटिसकेको र बाँकी ३० करोड रुपैयाँ आगामी असोजभित्र संकलन गर्ने गरी प्रक्रिया अघि बढाइएको उनले जानकारी दिए ।
साधारणसभाले कम्पनीको अधिकृत तथा जारी पुँजी वृद्धि गरी १०० करोड रुपैयाँ पुर्याउने निर्णय गरेको छ । यसमध्ये ७० करोड रुपैयाँ स्वपुँजी र ३० करोड रुपैयाँ प्रारम्भिक सार्वजनिक निष्कासन (आईपीओ) मार्फत जुटाउने योजना स्वीकृत गरिएको छ ।
त्यस्तै, आयोजना निर्माणका लागि आवश्यक बैंक ऋण लिने, त्यससम्बन्धी प्रक्रिया अगाडि बढाउने तथा आवश्यक सम्झौता गर्न कम्पनीको सञ्चालक समितिलाई अख्तियारी प्रदान गर्ने निर्णय पनि साधारणसभाले गरेको छ ।
कम्पनीले वित्तीय स्रोत व्यवस्थापन, सरकारी स्वीकृति तथा निर्माण कार्यलाई समानान्तर रूपमा अघि बढाउँदै खिम्ती ध्वाँङ खाेला आयोजना निर्धारित समयमै सम्पन्न गर्ने प्रतिबद्धता जनाएको छ ।
