काठमाडाैँ । विद्युत् नियमन आयोगका नवनियुक्त अध्यक्ष डा. रामप्रसाद धितालसहित सदस्यहरूले पद तथा गोपनीयताको सपथ ग्रहण गरेका छन् । ऊर्जा, जलस्रोत तथा सिँचाइ मन्त्री विराजभक्त श्रेष्ठले बिहीबार अध्यक्ष धिताल तथा सदस्यहरू जयराज भण्डारी, बलराम सिलवाल र लोकराज पाठकलाई सपथ गराएका हुन् ।
सपथ ग्रहणलगत्तै अध्यक्ष तथा सदस्यहरूले आयोगको कार्यालय पुगेर पदबहाली गरेका छन् । बुधबार बसेको मन्त्रिपरिषद् बैठकले डा. धिताललाई आयोगको अध्यक्ष तथा भण्डारी, सिलवाल र पाठकलाई सदस्यमा नियुक्त गर्ने निर्णय गरेको थियो ।
आयोगमा अध्यक्षसहित चार पदाधिकारी नियुक्त भएसँगै नेतृत्वले पूर्णता पाएको छ । यद्यपि, महिला सदस्यका लागि छुट्याइएको एक पद भने अझै रिक्त रहेको छ ।
डा. धिताल यसअघि पनि विद्युत् नियमन आयोगको अध्यक्षका रूपमा कार्य गरिसकेका छन् । सदस्यमा नियुक्त जयराज भण्डारी र बलराम सिलवाल नेपाल विद्युत् प्राधिकरणका अवकाशप्राप्त निर्देशक हुन् भने लोकराज पाठक ऊर्जा, जलस्रोत तथा नियामक क्षेत्रको अनुभव भएका व्यक्तित्वका रूपमा परिचित छन् ।
