काठमाडौँ । हाइड्रो इलेक्ट्रिसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआईडिसीएल) बाट ४४ वटा आयोजनाका लागि ६१ अर्ब ६४ करोड रुपैयाँ लगानी स्वीकृत भएको छ । स्थापनाकालदेखि हालसम्म सो परिमाणको लगानी स्वीकृत भएको हो ।
कम्पनीबाट स्वीकृत भएको लगानीमध्ये १४ अर्ब ५५ करोड रुपैयाँ प्रवाह भइसकेको छ । बाँकी ४७ अर्ब ९ करोड रुपैयाँ प्रवाह हुन बाँकी रहेको कम्पनीले जानकारी दिएको छ ।
कम्पनीका अनुसार स्वीकृत लगानीको रकम अपेक्षाअनुसार समयमा प्रवाह हुन नसक्दा बैंक मौज्दातमा वृद्धि भएको छ ।
कम्पनीबाट जलविद्युत् परियोजनामा प्रवाह भएको कर्जामध्ये ७ अर्ब ४८ करोड रुपैयाँ कर्जा बाँकी रहेको पनि कम्पनीले जानकारी दिएको छ । सञ्चालनमा आएका आयोजनाहरूबाट कर्जा भुक्तानी तालिकाअनुरुप नियमित रुपमा भइरहेको जनाइएको छ ।
आर्थिक वर्ष २०८१/८२ को असार मसान्तसम्ममा बजार मूल्य अनुसार स्वपूँजी लगानी अन्तर्गत सार्वजनिक एव् निजी क्षेत्रबाट प्रवर्द्धित जलविद्युत् तथा नवीकरणीय ऊर्जा सम्बन्धी परियोजना वा कम्पनीहरूमा ४ अर्ब ४५ करोड रुपैयाँ स्वपूँजी लगानी भएको छ ।
सहायक कम्पनीमार्फत घुन्सा खोला र सिम्बुवा खोला
कम्पनीले आफ्नो सहायक कम्पनीमार्फत घुन्सा खोला र सिम्बुवा खोला जलविद्युत् आयोजनाको निर्माण प्रक्रिया अघि बढाएको छ । यी आयोजनाहरूको सेयर संरचनामा नेपाल विद्युत् प्राधिकरण र विद्युत् उत्पादन कम्पनी लिमिटेडलाई समेत सहभागी गराई सेयर संरचना परिवर्तन गरिएको कम्पनीले जानकारी दिएको छ ।
घुन्सा खोलाको विद्युत् खरिद बिक्री सम्झौता (पीपीए) र वित्तीय व्यवस्थापनको कार्य सम्पन्न भइसकेको छ । यसैगरी, सिम्बुवा खोलाको निर्माण पूर्वका अन्य कार्यहरू सम्पन्न भई विद्युत् खरिद बिक्री सम्झौता र वित्तीय व्यवस्थापनको प्रक्रियामा रहेको छ ।
