काठमाडाैँ । हिमाल आइरन एण्ड स्ट्रिल प्रालिले नेपाल विद्युत् प्राधिकरण विरुद्ध दायर गरेकाे रिट खारेज भएकाे छ । मंगलबार सर्वोच्चका न्यायाधीशद्वय प्रकाशमान सिंह राउत र महेश शर्मा पौडेलको संयुक्त इजलासले कम्पनीद्वारा डेडिकेटेड तथा ट्रंकलाइनको बक्यौता उठाउने प्राधिकरणको निर्णयविरुद्ध २०७५ फागुन ९ गते दायर गरेकाे रिट खारेज गरेकाे हाे ।
रिट खारेजीसँगै हिमाल आइरनले अब नेपाल विद्यत् प्राधिकरणले तोकेको डेडिकेटेड र ट्रंकलाइन बक्यौता रकम तिर्नुपर्ने भएको छ । प्राधिकरणले गत असोजमा सार्वजनिक गरेको विवरणअनुसार हिमाल स्टिलले नेपालमा लोडसेडिङका बेला डेडिकेटेड र ट्रंकलाइन मार्फत विद्युत् उपभोग गरेको बिल १३ करोड ६५ लाख रुपैयाँ तिर्न बाँकी थियो ।
पर्सा औद्योगिक करिडोरअन्तर्गत परवानीपुरमा सञ्चालनमा रहेको हिमाल आइरन एन्ड स्टिलले डेडिकेटेड तथा ट्रंकलाइनबाट विद्युत् खपत गरेबापत गरिएको छुट बिलको बक्यौता रकम यसअघि नै तिर्न थालेको थियो । २०८० पुसमा बक्यौता नतिरेको भन्दै प्राधिकरणले विद्युत लाइन काटेपछि त्यतिबेला पहिलो किस्ताबापत २७ लाख १० हजार रुपैयाँ बुझाएसँगै प्राधिकरणले लाइन जोडिदिएको थियो ।
