काठमाडौँ । सिटिजन्स बैंक लिमिटेडले हालसम्म साढे ६ सय मेगावाटका जलविद्युत् आयोजनामा ऋण लगानी गरेको छ । बैंकले देशका विभिन्न ठाउँमा पहिचान गरी निर्माण अघि बढेका आयोजनामा लगानी गरेको हो ।
हालसम्म ६४१ मेगावाटका २९ जलविद्युत् आयोजनामा लगानी गरेको बैंकका प्रमुख कार्यकारी अधिकृत गणेश राज पोखरेलले बताए । ‘लगानी गरिएकामध्ये १२४.५४१ मेगावाट क्षमताका १३ विद्युत् आयोजनाको निर्माण पूरा भई सञ्चालनमा रहेका छन्,’ उनले भने, ‘बाँकी ५१७ मेगावाटका २९ विद्युत् आयोजना निर्माणका विभिन्न चरणमा छन् ।’
निर्माणका चरणमा रहेकामध्ये १५ वटा विद्युत् आयोजनामा अगुवाई बैंकको रूपमा लगानी गरेको पोखरेलले जानकारी दिए । दुईवटा हाइड्रो पावरमा सह–अगुवा बैंक, ९ वटा हाइड्रो पावर आयोजनामा सहभागी बैंकको रूपमा र ३ वटा हाइड्रो पावर आयोजनामा एकल लगानी रहेको छ ।
सिटिजन्स बैंकले पहिलो पटक वि.स २०६४ सालमा सेन्टर फर पावर डेभलपमेन्टले अघि बढाएको एक मेगावाटको जलविद्युत् आयोजनामा लगानी गरेको थियो ।
बैंकले हालै मात्र ४१.०६ मेगावाटको संखुवा खोला जलविद्युत् आयोजनामा लगानी गर्ने गरी वित्तीय व्यवस्थापन सम्झौता सम्पन्न भएको छ । यसमा बैंकले अुगुवा बैंकको रूपमा २ अर्ब ९० करोड रुपैयाँ ऋण लगानी गर्ने गरी सम्झौता गरेको छ ।
