काठमाडाैँ । नेपाल विद्युत प्राधिकरणका कार्यकारी निर्देशकबाट बर्खास्त गरिएका कुलमान घिसिङ र नवनियुक्त कार्यकारी निर्देशक हितेन्द्रदेव शाक्यले दायर गरेका रिट न्यायाधीशद्वय कुमार चुडाल र नित्यानन्द पाण्डेयको इजलासमा परेको छ ।
मंगलबार सर्वोच्च अदालतको दैनिक पेसी सूचीको पहिलो नम्बरमा कुलमान र दोस्रोमा हितेन्द्रको निवेदन परेकाे छ । गत आइतबार प्रधानन्यायाधीश प्रकाशमान सिंह राउत र न्यायाधीश शारंगा श्रेष्ठको इजलासमा परे पनि प्रत्यर्थी हितेन्द्रदेव शाक्यको तर्फबाट वरिष्ठ अधिवक्ता राधेश्याम अधिकारीले वकालतनामा दिएपछि हेर्न नमिल्ने भएको थियो ।
विद्युत प्राधिकरणको कार्यकारी निर्देशकबाट गैरकानुनी रुपमा हटाएको भन्दै बिहिबार घिसिङले सर्वोच्चमा रिट दायर गरेका थिए । सरकारले ४ वर्ष अगाडिको कुलमानलाई नियुक्त गरेर आफूलाई हटाएको मुद्दा टुंगो नलाग्दै सरकारले आफूलाई पुनः विद्युत प्राधिकरणको कार्यकारी निर्देशकको जिम्मेवारी दिएकोले शाक्यले पुरानो मुद्दा टुंगाइदिन भन्दै विहीबार सर्वोच्च अदालतमा निवेदन दिएका हुन् ।
शुक्रबार सर्वोच्चका न्यायाधीश अब्दुल अजीज मुसलमानको इजलासमा पेसी चढेको मुद्दामा सुनुवाई गर्दै न्यायाधीश मुसलमानले अन्तरिम आदेश दिएनन् भने आइतबार दुबै पक्षलाई बोलाउने आदेश गरेका थिए ।
