काठमाडौँ । अमेरिकी सहायता संस्था मिलेनियम च्याजेञ्ज कर्पोरेशन (एमसीसी) को नेपाल कम्प्याक्टले कार्वन्वयनकाे निरन्तरता पाएसँगै ४०० केभी डबल सर्किटको ३१५ किलामिटर लामाे लाइन तथा सबस्टेसन निर्माणको अन्यौल हटेको छ । अर्थ मन्त्रालयले सोमबार अर्थात आज विज्ञप्ती जारी गर्दै नेपाल कम्प्याक्टको निरन्तरताका लागि सिफारिस भएको जानकारी दिएको छ ।
नेपाल सरकार र यस निकायबीच २०७४ भदौ २९ गते एमसीसी कार्यान्वयनबारे सम्झौता भएको थियो । कम्प्याक्ट कार्यन्वयन अमेरिकी राष्ट्रपतिको जनवरी २०, २०२५ को कार्यकारी आदेशानुसार पुनरावलोकनका लागि स्थगन भएकोमा एमसीसीको जुलाई २४, २०२५ को पत्रबाट उक्त पुनरावलोकन कार्य समाप्त भएको अर्थ मन्त्रालयले जानकारी दिएको छ ।
अर्थमन्त्रालयका अनुसार हालसम्म ८.४६ प्रतिशत काम पूरा छ । अमेरिकी अनुदानअन्तर्गत एमसीसीले नेपालमा विद्युत् र सडक पूर्वाधारमा लगानी गरिरहेको थियो । अमेरिकाको ५०० मिलिअन डलर र नेपालको १९७ मिलिअन डलर खर्च गरेर ३०० किलोमिटर विद्युत् प्रसारण लाइन र सबस्टेशन निर्माण अनि ७७ किलोमिटर सडकको स्तरोन्नति र मर्मतको लक्ष्य राखिएको थियो ।
उक्त परियोजनाअन्तर्गत लप्सीफेदी–रातमाटे, रातमाटे–दमौली, दमौली–बुटवल र बुटवल– नेपाल–भारत सीमासम्म (गोरखपुर) ४०० केभी प्रसारण लाईन र सम्बद्ध सवस्टेशनहरु निर्माण हुनेछ ।
