काठमाडाैँ । सोलु हाइड्रो पावर लिमिटेडले आजबाट सर्वसाधारणका लागि आईपीओ खुला गरेको छ । कम्पनीले पहिलो चरणमा वैदेशिक रोजगारीमा रहेका नेपालीका लागि तथा आयोजना प्रभावित स्थानीय बासिन्दाका लागि शेयर निष्काशन गरी बाँडफाँड पश्चात सर्वसाधारणका लागि खुला गरेकाे हाे ।
सर्वसाधारणका लागि प्रतिकित्ता १०० रुपैयाँ अंकित मूल्यमा कुल ८२ लाख कित्ता साधारण सेयर निष्काशन गरेको कम्पनीले जनाएकाे छ । इच्छुक लगानीकर्ताले न्यूनतम १० कित्तादेखि अधिकतम १ लाख कित्तासम्म आवेदन दिन सक्ने व्यवस्था गरिएको छ । सर्वसाधारणले छिटोमा माघ ४ गते र मागअनुसार ढिलोमा माघ १४ गतेसम्म आवेदन दिनुपर्नेछ ।
नेपाल धितोपत्र बोर्डबाट कम्पनीले कुल २ करोड कित्ता साधारण सेयर निष्काशनको अनुमति पाएको थियो, जसको कुल मूल्य २ अर्ब रुपैयाँ बराबर हुन्छ । सोमध्ये पहिलो चरणमा वैदेशिक रोजगारीमा रहेका नेपालीका लागि १० लाख कित्ता तथा आयोजना प्रभावित स्थानीय बासिन्दाका लागि १ करोड कित्ता सेयर बिक्री भइसकेको छ ।
त्यसैगरी, सामूहिक लगानी कोषका लागि ५ लाख कित्ता र कम्पनीका कर्मचारीका लागि ३ लाख कित्ता सेयर छुट्याइएपछि बाँकी रहेको ८२ लाख कित्ता सर्वसाधारणलाई बिक्रीमा ल्याइएको हो ।
आईपीओ निष्काशन तथा बिक्री प्रबन्धकको जिम्मेवारी नबिल इन्भेष्टमेन्ट बैंकिङ लिमिटेड र हिमालयन क्यापिटल लिमिटेडले सम्हालेका छन् ।
