काठमाडाैँ । सरकारले चार वटा जलविद्युत् आयोजनालाई राष्ट्रिय वन क्षेत्र प्रयोग गर्न स्वीकृति दिएको छ । सरकारले तल्लो अरुण जलविद्युत् आयोजना सहित चार जलविद्युत् आयोजनालाई राष्ट्रिय वन क्षेत्र प्रयोग गर्न स्वीकृति दिने निर्णय गरेको हाे ।
सरकारका प्रवक्ता तथा सञ्चार तथा सूचना प्रविधिमन्त्री सस्मित पोखरेलका अनुसार मंगलबार सिंहदरबारमा बसेको मन्त्रिपरिषद् बैठकले उक्त निर्णय गरेको हो ।
निर्णयअनुसार तल्लो अरुण जलविद्युत् आयोजनासहित लोवर न्यादी खोला जलविद्युत् आयोजना, हुन्सा खोला जलविद्युत् आयोजना र तादी खोला जलविद्युत् आयोजनालाई राष्ट्रिय वन क्षेत्र प्रयोग गर्न अनुमति प्रदान गरिएको छ ।
वन क्षेत्र प्रयोगको स्वीकृतिसँगै यी आयोजनाहरूको निर्माण तथा पूर्वाधार विकास प्रक्रिया थप सहज हुने अपेक्षा गरिएको छ। जलविद्युत् उत्पादन क्षमता विस्तार गर्दै ऊर्जा क्षेत्रलाई सुदृढ बनाउने सरकारको नीतिअनुसार यस्तो निर्णय गरिएको बताइएको छ ।
