काठमाडौँ । नेपाल–बंगलादेशका ऊर्जा सचिवस्तरीय बैंठक साउन १४ र १५ गते पोखरामा हुने भएको छ । यो छैटौं बैंठक हो ।
बैठकमा ६८३ मेगावाटको सुनकोसी–३ जलविद्युत् आयोजना निर्माणका लागि सयुक्त कम्पनी स्थापना गर्ने सम्झौता गर्ने तयारी छ । यो आयोजना बंगलादेश आफैले निर्माण गरेर उत्पादीत विद्युत् लैजाने योजना छ । यसका लागि प्राविधिक सहितको बंगलादेशी टोलीले यो आयोजनाको स्थलगत निरीक्षण समेत गरिरहेको छन् ।
आयोजनाको बाँधस्थल रामेछापको खाँडादेवी र काभ्रेको तेमाल गाउँपालिकामा पर्छ । आयोजना निर्माण सुरु भएको करिब ७ वर्षमा सञ्चालनमा आउने अनुमान गरिएको छ । २०८२ मा निर्माण सुरु गरी २०८८ मा सम्पन्न गर्ने योजना छ । आयोजना निर्माणका लागि १ खर्ब ६० अर्ब रुपैयाँ लाग्ने अनुमान गरिएको छ । आयोजना पूरा भएपछि वार्षिक २ अर्ब ३५ करोड युनिट विद्युत् उत्पादन हुनेछ ।
दुई देशका अघिल्ला बैंठकहरू
यसअघिको अर्थात पाँचौं बैठक २०८० जेठ १ र २ गते बंगलादेशको ढाकामा सम्पन्न भएको थियो । यसैगरी, पहिलो बैठक २०७५ मंसिर १७ र १८ गते काठमाडौँमा सम्पन्न भएको थियो । दोस्रो बैठक २०७६ असार ५ र ६ गते कोक्स बजार बंगलादेशमा सम्पन्न भएको थियो । तेस्रो बैठक २०७८ भदौ २९ गते भर्चुअल माध्यममार्फत दुवै देशका ऊर्जा सचिवहरूको बैठक सम्पन्न भएको थियो । चौथो बैठक २०७९ भदौ ८ र ९ गते काठमाडौँको सोल्टी होटेलमा सम्पन्न भएको थियो ।
