काठमाडौँ । गोल्याण पावर लिमिटेड र प्रोजिल ग्रिन इनर्जी लिमिटेड संयुक्त उपक्रम सम्झौतामा (जोइन्ट भेन्चर एग्रिमेन्ट ‘जेभीए’)मा हस्ताक्षर भएको छ । यी दुई कम्पनीबीच २०८१ भदौ १८ गते (मंगलबार) हस्ताक्षर भएको हो ।
सम्झौतामा गोल्याण पावरका निर्देशक अक्षय गोल्याण र प्रोजिल ग्रिन इनर्जीका निर्देशक शोबित बैजनाथ रायले हस्ताक्षर गरे । दिगो ऊर्जा प्रवर्द्धन गर्ने र ऊर्जा क्षेत्रमा संयुक्त विशेषज्ञतालाई उपयोग गर्ने उद्देश्यका साथ यो रणनीतिक साझेदारी गरिएको गोल्याण पावरका निर्देशक अक्षय गोल्याणले बताए । उनका अनुसार यो सम्झौताले हरित भविष्यको साझा दृष्टिकोणलाई जोड दिन्छ ।
पछिल्लो समय विद्युत् क्षेत्रको विकासमा सक्रिय बनेको औद्योगिक घराना गोल्यान समूहले करिब ७८१ मेगावाटका जलविद्युत् आयोजनाको निर्माण प्रक्रिया अघि बढाएको छ । यसैगरी ६० मेगावाटको सौर्य आयोजना विभिन्न चरणमा छन् । कृषि, निर्माण, वित्तीय सेवा लगायत विभिन्न क्षेत्रमा आवद्ध रहेको समूहले ऊर्जा विकासमा पनि व्यापक रूपमा अघि बढेको छ ।
