काठमाडाैँ । नेपालले शुक्रबार अर्थात कात्तिक ३० गतेदेखि बंगलादेशमा बिजुली निर्यात गर्ने भएको छ । लामो समयदेखिको निरन्तर छलफल र वार्तापछि गत असोज १७ गते भएको त्रिपक्षीय सम्झौताअनुसार नेपालको ४० मेगावाट बिजुली भोलीदेखि बंगलादेश निर्यात हुने भएको हो ।
भारतबाट स्वीकृति आएसँगै शुक्रबारदेखि बंगलादेशलाई बिजुली बिक्री गर्न लागिएकाे नेपाल विद्युत् प्राधिकरणका प्रवक्ता चन्दनकुमार घोषले बताए । बंगलादेशलाई बिजुली बेच्दा मुलुकलाई प्रति महिना करिब ३३ करोड रुपैयाँ आम्दानी हुने छ । प्रतियुनिट ६.४० अमेरिकी सेन्टका दरले ५ महिनामा ९२ लाख १६ हजार अमेरिकी डलर आम्दानी हुने प्राधिकरणले जनाएको छ ।
नेपालले हरेक वर्षको जुन १५ देखि नोभेम्बर १५ सम्म बंगलादेशलाई बिजुली बिक्री गर्ने सम्झौतामा छ । सोहीअनुसार नेपालले यस वर्ष शुक्रबार अर्थात भाेली मात्रै बंगलादेशलाई बिजुली बेच्दैछ । त्यसपछि बंगलादेशलाई बिजुली बेच्न अर्को वर्ष कुर्नु पर्नेछ ।
प्राधिकरणले २५ मेगावाटको त्रिशूली र सहायक कम्पनीमार्फत निर्माण गरिएको २२ मेगावाटको चिलिमे जलविद्युत् आयोजनाबाट उत्पादित बिजुली बंगलादेशलाई बिक्री गर्ने जनाएको छ ।
नेपाल र भारतबीचको पहिलो अन्तरदेशीय ढल्केबर–मुजफ्फरपुर ४०० केभी प्रसारण लाइन हुँदै बंगलादेश निर्यात हुने विद्युतको मूल्य प्राधिकरणले भारतरको मुजफ्फरपुर विन्दुमा पाउने छ । अर्थात बंगलादेश निर्यात हुने विद्युतको मिटर मुजफ्फरपुरमा रहने छ । ढल्केबरबाट मुजफ्फरपुरसम्मको प्रसारण लाइनको प्राविधिक चुहावट प्राधिकरणले नै बेहोर्नेछ । मुजफ्फरपुरबाट भारतको प्रसारण लाइनमार्फत बहरामपुर (भारत)–भेरमारा (बंगलादेश) ४०० केभी प्रसारण लाइन हुँदै बंगलादेश विद्युत् पुग्नेछ ।
याे पनि पढ्नुहाेसः बंगलादेशमा विद्युत् व्यापारको बाटो खुल्यो, ऊर्जा क्षेत्रका लागि कोशेढुङ्गा
