काठमाडौँ । सप्तरीको खड्क नगरपालिकाले स्थानीय किसानको सिँचाइ मिटरको बक्यौता महसुल नेपाल विद्युत् प्राधिकरण बोदेबरसाइन वितरण केन्द्रलाई बुझाएको छ । नगरपालिकामा रहेका सम्पूर्ण किसानको सिँचाइ मिटरको बक्यौता महसुल चेकमार्फत बुझाइएको हो ।
आर्थिक वर्ष (आव) २०८०/८१ मा नगरपालिकाले घोषणा गरेबमोजिम सिँचाइ मिटरवापतको ७ लाख ३३ हजार ७०५ रुपैयाँ बक्यौता नगरपालिका प्रमुख जय प्रकाश चौधरीले चेकवापत बुझाएकाे केन्द्र प्रमुख ई.संयोग विश्वकर्माले जानकारी दिए । किसानहरूको सिँचाइ मिटरवापतको महसुल केन्द्रलाई बुझाएको नगरपालिका प्रमुख चौधरीले बताए ।
आगामी दिनमा पनि नगरपालिकाले नै सिँचाइ मिटरवापतको बक्यौता भुक्तानी गर्ने भएकोले किसानहरूमा उत्साह बढाएको छ । यसले कृषि प्रधान देश कृषि क्रान्तिको बाटोतिर अग्रसर हुँदै गएको प्रष्ट देखिन्छ ।
