काठमाडौँ । ऊर्जा, जलस्रोत तथा सिँचाइ मन्त्री दीपक खड्काले नेपालको ऊर्जा क्षेत्रमा प्राविधिक जनशक्तिको ठूलो अभाव रहेको बताएका छन् । पुल्चोक क्याम्पसमा प्रयोगशाला उद्वघाटन समारोहमा बोल्दै उनले यस्तो बताएका हुन् ।
‘ऊर्जा क्षेत्रमा ठूलो धनराशी खर्च भइसकेको छ,’ उनले भने, ‘अझै ठूलो लगानी गर्ने तयारी भइरहेको छ । निजी क्षेत्र पनि सक्रिय रूपमा अघि बढेका छन् । यस्तो खर्च भइरहेको क्षेत्रमा प्राविधिक जनशक्ति कमजोर दखिएको छ ।’
‘अस्तिमात्र म केही प्रोजेक्टहरू निरीक्षणमा जाँदै गर्दा टर्बाइनहरू मर्मत संभार गर्ने बेलामा जनशक्तिको असाध्यै ठूलो अभाव देखियो । त्यसकारण हामीलाई चाहिने जनशक्ति उत्पादन गरेर यही सदुपयोग गर्न पाइयो भने अरुको भर पर्न पर्दैन । रोजगारी पनि सिर्जना हुन्छन्’ उनले भने ।
मन्त्री खड्काले पछिल्लो समय नयाँ नयाँ प्रविधिहरू आइरहँदा प्रविधिलाई सुरक्षित गर्न के गर्न सकिन्छ भनी अध्ययन अध्यापन अत्यन्तै जरुरी रहेको बताए ।
उनले भने, ‘हरेक घरमा विद्युतीय सामग्री हुन्छन् । जोखिम खालका हुन्छन् । नयाँ नयाँ प्रविधीहरु आइरहेको छन् । त्यो प्रविधिको प्रयोग धेरैभन्दा धेरै गर्नुपर्नेछ । त्यसकारणले पनि यस्ता प्रविधिहरुलाई सुरक्षित गर्न के गर्न सकिन्छ भनी अध्ययन अध्यापन अत्यन्त गर्न जरुरी छ, थियो र भइरहेको छ ।’
