काठमाडाैँ । दोर्दी खोला जलविद्युत् कम्पनीकाे हकप्रद सेयर आवेदन फेरि खुल्ला भएकाे छ । कम्पनीले आज वैशाख १२ गतेदेखि वैशाख १४ गतेसम्म अवधि थप गरेर आवेदन माग गरेकाे हाे ।
कम्पनीको वैशाख ११ गते बसेको संचालक समितिको बैठकले यो निर्णय गरेको हो । कम्पनीले हाल कायम १ कित्ता शेयर बराबर नयाँ १ कित्ता अनुपातमा हकप्रद शेयर निष्काशन गरेकाे छ । यस अनुसार कम्पनीले १ अर्ब ५ करोड ४२ लाख ६० हजार ४०० रुपैयाँ बराबरको प्रतिशेयर १०० रुपैयाँ अंकित मूल्यका १ करोड ५ लाख ४२ हजार ६०४ कित्ता हकप्रद शेयर निष्काशन गरेकाे छ ।
कम्पनीले यसअघि चैत १९ गतेदेखि शतप्रतिशत हकप्रद सेयर निष्कासन गरेकाे थियाे । कम्पनीका अनुसार इच्छुकले बैशाख ८ गतेसम्म सेयर किन्ने अवधि थियाे ।
हकप्रद शेयर निष्काशन प्रयोजनार्थ कम्पनीले फागुन १५ गते बुकक्लोज गरेको थियो । यस अनुसार फागुन १३ गतेसम्म नेप्सेमा कारोबार भइ कायम शेयरधनीहरू सो हकप्रद शेयरका लागि आवेदन दिन सक्नेछन् ।
हकप्रद निष्काशनका लागि गराएको रेटिङ्गमा इक्रा नेपालले कम्पनीलाई इक्रा एपी इस्यूअर रेटिङ्ग बी प्लस प्रदान गरेको छ। यसले समयमा वित्तीय दायित्व बहन गर्ने क्षमतामा उच्च जोखिम रहेको संकेत गर्दछ।
