काठमाडाैँ । डेडिकेटेड तथा ट्रंक लाइनबाट विद्युत उपभोग गरेको हुलास स्टील इण्डष्ट्रिज र अशोक स्टिलले प्रिमियम महसुलको बक्यौता रकम नेपाल विद्युत प्राधिकरणलाई तिर्न सुरु गरेका छन् । उद्याेगीले शुक्रबार पहिलाे किस्ता बुझाएका हुन् ।
हुलासले २०७२ माघदेखि २०७५ वैशाखसम्मको प्रिमियम दरको विद्युत् प्रयोग गरेबापतको बक्यौता रकम कुल १४ करोड १२ लाख रुपैयाँ रहेको थियो । यो बक्यौता रकमलाई प्रतिकिस्ता ५० लाख ४३ हजार रुपैयाँका दरले २८ किस्तामा बुझाउने स्वीकृति प्राधिकरणबाट पाएको छ । यसैगरी, अशोक स्टिलको १७ करोड ५८ लाख रुपैयाँ बक्यौता रहेको रहेकाे छ । जसले २६ किस्तामा बक्यौता चुक्ता गर्ने गरी पहिलो किस्ताको ६३ लाख रुपैयाँ बुझाएको छ ।
हिजाे मात्रै तीन उद्याेगीले बक्याैताकाे किस्ता बुझाएका थिए । सम्राट सिमेन्ट, रोल्पा सिमेन्ट र नव नेपाल प्लास्टिक इन्डिस्ट्रिजले किस्ता तिरेका हुन् ।
