काठमाडाैँ । बहुप्रतिक्षित कोहलपुर–सुर्खेत १३२ केभी विद्युत प्रसारण लाइन निर्माणकार्य अन्तिम चरणमा पुगेको छ । हर्रे क्षेत्रमा करिब १६ सय मिटर दूरीमा ड्रोनको सहायताले तार तान्ने काम सुरु गर्न तयारी थालिएसँगै परियोजनाले समापनतर्फ तीव्रता पाएको हो ।
यो प्रसारण लाइनमार्फत २०४५ सालमा वीरेन्द्रनगर ल्याइएको ३३ केभी लाइन विस्थापन हुनेछ । यससँगै सुर्खेतसहित आसपासका जिल्लाले लामो समयदेखि झेल्दै आएको लो–भोल्टेज समस्या समाधान हुने अपेक्षा लिइएको छ ।
परियोजनाअनुसार १३२ केभी प्रसारण लाइनको औपचारिक उद्घाटन आगामी माघ १ गते गर्ने तयारी गरिएको छ। प्रसारण लाइन सञ्चालनमा आएपछि स्थिर र गुणस्तरीय विद्युत आपूर्ति सुनिश्चित भई औद्योगिक तथा घरेलु उपभोक्ताले प्रत्यक्ष लाभ पाउने छन् ।
स्थानीय बासिन्दाले पनि परियोजना पूरा हुन लागेकोमा खुशी व्यक्त गर्दै विद्युत व्यवस्थामा स्थायित्व आउने विश्वास व्यक्त गरेका छन् ।
