काठमाडाैँ । चितवनको देवघाटस्थित नारायणी नदीको जलसतह खतरा तहभन्दा माथि पुगेको छ । नदीको जलसतह ९.३ मिटरको खतरा तह पार गरी निरन्तर बढिरहेको जनाइएको छ ।
हालको पूर्वानुमानअनुसार नारायणीको जलसतह ऐतिहासिक अधिकतम ११.६ मिटरभन्दा माथि पुगेर करिब १३ मिटर सम्म पुग्न सक्ने अनुमान गरिएको छ । आज बिहान करिब ११ बजे आसपास नदीको जलसतह १३ मिटर पुग्न सक्ने सम्भावना रहेको छ ।
यसैगरी रुपन्देही, कपिलवस्तु, चितवन, नवलपरासी पूर्व तथा पश्चिम, लमजुङ, कास्की, मनाङ, मुस्ताङ, म्याग्दी, बागलुङ, पर्वत, तनहुँ, स्याङ्जा, पाल्पा र गुल्मी तथा आसपासका जिल्लाबाट बहने साना नदी तथा खोलामा समेत बहाव उल्लेख्य बढ्न सक्ने चेतावनी दिइएको छ। ती क्षेत्रमा आकस्मिक बाढीको उच्च जोखिम रहेकाले स्थानीयवासीलाई सतर्क रहन आग्रह गरिएको छ ।
सम्भावित जोखिम क्षेत्रका बासिन्दालाई नदी किनार तथा तटीय क्षेत्रबाट टाढा रहन, सुरक्षित स्थानमा बस्न र सरकारी निकायबाट जारी हुने सूचना तथा निर्देशन पालना गर्न आग्रह गरिएको छ।
