सार्क ऊर्जा केन्द्र (एसईसी) र श्रीलंका सरकारको ऊर्जा मन्त्रालयको संयुक्त आयोजनामा नवीकरणीय ऊर्जा आयोजनाको वित्तीय नमुना निर्माणसम्बन्धी तीनदिने तालिम सम्पन्न भएको छ । श्रीलंकाको कोलम्बोस्थित होटल गाल फेसमा अक्टोबर ५ देखि ७, २०२६ सम्म भौतिक तथा भर्चुअल माध्यमबाट सञ्चालन भएको उक्त तालिममा सार्क सदस्य राष्ट्रका ऊर्जा क्षेत्रका पेशाकर्मी, नीतिनिर्माता तथा वित्तीय क्षेत्रका विज्ञहरूको सहभागिता थियो ।
तालिममा बंगलादेश, भुटान, माल्दिभ्स र आयोजक राष्ट्र श्रीलंकाका प्रतिनिधि भौतिक रूपमा सहभागी भएका थिए भने नेपाल र पाकिस्तानका प्रतिनिधिले भर्चुअल माध्यमबाट सहभागिता जनाएका थिए । अक्टोबर ५ मा आयोजित उद्घाटन समारोहमा श्रीलंकाका ऊर्जा मन्त्री अनुर करुणाथिलक प्रमुख अतिथिका रूपमा सहभागी भएका थिए । श्रीलंकाको ऊर्जा मन्त्रालयका सचिव जी. एम. आर. डी. अपोन्सुले प्राविधिक सत्रका लागि मुख्य मन्तव्य दिएका थिए । कार्यक्रममा श्रीलंकास्थित सार्क सदस्य राष्ट्रका कूटनीतिक प्रतिनिधिहरूको समेत उपस्थिति थियो ।
तीनदिने तालिममा नवीकरणीय ऊर्जासम्बन्धी राष्ट्रिय नीति तथा विश्वव्यापी प्रवृत्ति, आयोजना वित्त व्यवस्थापन, वित्तीय नमुना निर्माणका उपकरण र विद्युत् महसुल निर्धारणका विषयमा प्रशिक्षण दिइएको थियो । सहभागीलाई सोलार एन्डिस्टर मोडल (एसएएम), क्रेस्ट र रिटस्क्रिनजस्ता सफ्टवेयर उपकरणको प्रयोगबारे जानकारी दिनुका साथै आयोजनाको पुँजीगत लागत, आम्दानी, ऋण भुक्तानी तालिका, ऋण भुक्तानी क्षमता र जोखिम विश्लेषण समेटेर वित्तीय नमुना तयार गर्ने व्यावहारिक अभ्यास गराइएको थियो । यसका साथै सहभागीहरूले कोलम्बोस्थित एट्केन स्पेन्सको १० मेगावाट क्षमताको फोहोरबाट ऊर्जा उत्पादन गर्ने प्लान्टको अवलोकनसमेत गरेका थिए ।
तालिमले सार्क सदस्य राष्ट्रका प्रतिनिधिहरूलाई नवीकरणीय ऊर्जा आयोजनाको वित्तीय विश्लेषण तथा नमुना निर्माणसम्बन्धी प्राविधिक क्षमता अभिवृद्धि गर्न सहयोग पुग्ने आयोजकको अपेक्षा छ । यसबाट लगानीयोग्य ऊर्जा आयोजना विकास गर्न, निजी क्षेत्रको लगानी आकर्षित गर्न र अन्तर्राष्ट्रिय जलवायु वित्तमा पहुँच विस्तार गर्न सहयोग पुग्ने विश्वास गरिएको छ । तालिमले सदस्य राष्ट्रबीच ऊर्जा क्षेत्रको सहकार्य र समन्वय सुदृढ गर्दै दिगो तथा न्यून कार्बनमा आधारित क्षेत्रीय ऊर्जा अर्थतन्त्र विकासमा योगदान पुर्याउने अपेक्षा गरिएको छ ।
