काठमाडाैँ । १४४ मेगावाटकाे कालीगण्डकी ‘ए’ जलविद्युत् केन्द्रले २५ वैशाख साँझदेखि सरसफाइ तथा नियमित मर्मत सम्भार कार्य सञ्चालन गर्ने भएको छ । उक्त कार्यका कारण केन्द्रका तीनवटै विद्युत् उत्पादन मेसिन पूर्ण रूपमा बन्द गरिने भएको छ ।
केन्द्रका अनुसार साँझ ५ बजेदेखि सुरु हुने मर्मत अवधिभर पावरहाउसमा जाने पानी सुरुङमार्गबाट डाइभर्ट गरिनेछ भने ड्यामका सबै गेटहरू खोलिने छन् । यसले गर्दा कालीगण्डकी नदीमा साविकको तुलनामा पानीको बहाव बढ्ने र नदीको सतह अस्थायी रूपमा उच्च हुने सम्भावना रहेको जनाइएको छ ।
नदीको बहाव अचानक बढ्न सक्ने भएकाले सम्बन्धित निकायले नदी किनार तथा आसपासका बासिन्दा, निर्माण व्यवसायी र सर्वसाधारणलाई निर्माण सामग्री, उपकरण तथा अन्य सामग्री सुरक्षित स्थानमा सार्न आग्रह गरेको छ ।
त्यसैगरी मर्मत अवधिमा नदी किनार क्षेत्रमा अनावश्यक रूपमा नजान पनि विशेष अनुरोध गरिएको छ । केन्द्रले सम्भावित जोखिमलाई मध्यनजर गर्दै आवश्यक सतर्कता अपनाउन सबै सरोकारवालालाई आग्रह गरेको छ ।
