काठमाडौँ । रामजानकी हाइड्रो पावर प्राइभेट लिमिटेडले कोशी प्रदेशको संखुवासभामा ३५.१५ मेगावाटको माथिल्लो अप्सुवा खोला जलविद्युत् आयोजना निर्माण गर्ने भएको छ । कम्पनीले जिल्लाको सिलिचोङ गाउँपालिका वडा नम्बर ५ र मकालु गाउँपालिका वडा नम्बर १ को सिमाना भएर बग्ने अप्सुवा खोलामा आयोजना निर्माण गर्न लागेको हो ।
आयोजनाको वातावरणीय प्रभाव मूल्यांकन सम्पन्न गरी स्वीकृतीका लागि वन तथा वातावरण मन्त्रालयमा पुगेको छ । मन्त्रालयले प्रतिवेदन स्वीकृतीका लागि अन्तिम चरणको काम गरिरहेको छ ।
प्रतिवेदन अनुसार आयोजना अन्तर्गत सिलिचोङ गाउँपालिका वडा नम्बर ५ र मकालु गाउँपालिका वडा नम्बर १ को सिमानामा अवस्थित अप्सुवा खोलामा २० मिटर लामो र ५ मिटर अग्लो पानी फर्काउने बाँध निर्माण गरिनेछ ।
सो स्थानबाट २४७५ मिटर लामो भुमिगत जलप्रवाह प्रणाली हुँदै याङ्गदेन गाउँ भन्दा ८०० मिटर तल अवस्थित सतही विद्युतगृहसम्म पानी पुर्याइनेछ । र विद्युतगृहमा जडान भएको टर्वाइनमार्फत विद्युत् उत्पादन गरिनेछ ।
आयोजनाबाट उत्पादन भएको विद्युत् १३२ केभी प्रसारण लाइनमार्फत २४ किलोमिटर दुरीमा रहेको नेपाल विद्युत् प्राधिकरणको शितलपाटी सबस्टेसनमा जोडिनेछ ।
आयोजना निर्माण सम्पन्न गर्न ६ अर्ब ११ करोड ४० लाख रुपैयाँ लागत अनुमान गरिएको छ ।
