काठमाडाैँ । नेपाल विद्युत् प्राधिकरणले विद्युत् आपूर्ति अवरुद्ध नगरी चालु लाइनमै मर्मत–सम्भार गर्ने कार्यको नेपालमै पहिलोपटक सुरुवात गरेको छ । प्राधिकरणले लुम्बिनी प्रादेशिक कार्यालयमार्फत अत्याधुनिक उपकरणको प्रयोग गर्दै ‘लाइभ लाइन मेन्टिनेन्स’ प्रविधिको औपचारिक थालनी गरेको हो ।
प्राधिकरणका कायम मुकायम कार्यकारी निर्देशक दीर्घायुकुमार श्रेष्ठको उपस्थितिमा बुटवल उपमहानगरपालिका–११, कालिकानगरस्थित ११ केभी वितरण लाइनमा मर्मत गरी कार्यक्रमको शुभारम्भ गरिएको हो ।
लुम्बिनी प्रादेशिक कार्यालयका प्रमुख मनोजकुमार यादवले उपभोक्तालाई विद्युत् आपूर्ति अवरुद्ध नगरी गुणस्तरीय र भरपर्दो सेवा उपलब्ध गराउने उद्देश्यले यो प्रविधि नेपालमै पहिलोपटक प्रयोगमा ल्याइएको बताए ।
‘उपभोक्तालाई बिना अवरोध गुणस्तरीय तथा निरन्तर विद्युत् उपलब्ध गराउने उद्देश्यले चालु अवस्थाकै विद्युत् लाइनमा अत्याधुनिक उपकरण प्रयोग गरी मर्मत–सम्भार कार्य सुरु गरेका हौँ,’ यादवले भने । उनका अनुसार प्रारम्भमा नमुना परियोजनाका रूपमा सुरु गरिएको यो कार्य आगामी दिनमा आवश्यकता र प्रभावकारिताका आधारमा विस्तार गरिनेछ ।
वितरण तथा ग्राहक सेवा निर्देशनालयका उपकार्यकारी निर्देशक नवराज ओझाले हाल नमुनाका रूपमा सुरु गरिएको यो प्रविधिलाई विशेषगरी सहरी क्षेत्रमा नियमित मर्मत–सम्भारका क्रममा प्रयोग गर्ने योजना रहेको जानकारी दिए ।
कार्यक्रममा कार्यकारी निर्देशक श्रेष्ठ, उपकार्यकारी निर्देशक ओझा, लुम्बिनी प्रादेशिक कार्यालयका प्रमुख यादव, बुटवल ग्रिड महाशाखा प्रमुख अनिल बन्जाडेलगायत विभिन्न वितरण केन्द्र र आयोजना प्रमुखहरूको उपस्थिति रहेको थियो । तालिम प्राप्त प्राविधिक टोलीले अत्याधुनिक उपकरणको प्रयोग गरी चालु लाइनमै सुरक्षित रूपमा मर्मत कार्य सम्पन्न गरेको प्राधिकरणले जनाएको छ ।
प्राधिकरणका अनुसार भविष्यमा यो प्रविधिको व्यापक प्रयोग गर्न सकिए नियमित मर्मतका लागि अनिवार्य रूपमा गर्नुपर्ने लाइन कटौती उल्लेखनीय रूपमा घट्नेछ । यसबाट उपभोक्ताले बिना अवरोध थप भरपर्दो, गुणस्तरीय र निरन्तर विद्युत् सेवा प्राप्त गर्ने अपेक्षा गरिएको छ ।
